BYF, BDF, BCD Corner | KTZ

Belampute thuzak Hondampa hong piang

“Tuni in nou ading in David khua ah Hondampa a piangta, amah Khrist Toupa ahi…” (Luka 2:11)


Thupatna: Amasa pen in, Khristiante ading a, ni kipahhuai, ni poimoh Khristmas hunbi hong naitak toh kiton in, Belampute thuzak Hondampa hong piang” chih thupi a nei in genkhawm ni. Jesu nang leh kei ading a Pathian in a hon piansakna kizaksakna tuh thukipahhuai leh hamphathuaitak ahi. Pathian in Jesu hon piansakna a a tup thupipen tuh eite Hotdam a i om theihna ding deihna leh Pathian nasepna eite apan sepkhiat a om ding deihna ahi. Hiai hotdamna michih ading ahi. Jesu Khrist hong pianna tungtawn in a bukim a theihsak ahita hi. Hotdamna ding, a lampi omsun tuh Jesu ahi hi.


Jesu pianna belampute theihsak in om masa ua, Belampute’n athuzak uh Pathian in amau adia hondampa ding a Jesu hong piang ahih dan ginglah lou a, a hondampa ding ua a neihtheihna ding ua, apan lakdan uh point thum in i gen ding hi:

I. BELAMPUTEN: ATHUZAK UH POIMOH NGAIH IN NGAIHVEN PAH UH.

A. Belampute dinmun: Belampute lehkha siamlou leh mimawltakte ahi uh. A innkuan khosak bawlna ding a mihausate belamte ching a kiloh. Sun leh zan a belamte ching den. Thuthak zabanlou a, mawltak a hingte ahi uh. Atom a gen in miphawk batlouhte ahi uh.

B. Belampute’n thuzak khat nei uh: A thuzak khat uh tuh Jesu pian thu ahi, hiai Jesu piangpen michih (azawng ahau, atek akhang, aneu alian leh namchih) ading a Hondampa ding ahi. Tua ahihman in Belampute leng theihsak a om kha uh ahi.


C. Belampute’n a thuzak uh poimohsa uh: Belampute’n a thuzak uh ngaipoimoh leh ngaihven in, thil zumhuai a sim lou in, amau ading ahihdan theisiam in, thildang tengteng sang a poimoh pen a koih in, kizekaisak lou uhi. Jesu Khrist pianna tuh thupoimoh ahi a, nang leh kei ading a leng poimoh ahi a, hiai thu theihsak i hihtak ziak un, thildang teng sang a ngaihpoimoh pen ding ahi.

II. BELAMPUTEN: ATHUZAK ZIAK UN BELAMTE LEH AMUN NUSIA.
Belampute belam chinte: Belamte amau a hilou, aneitu om ahi. Hoihtak a kemlou leh nusia a omleh, tai leh salh thuak thei, a nnasep topsak theih ahi. Amau deihdan a om theihlou ahi uh.

Belampute’n belamte leh amun nusia: Belampute a dinmun uh haksatak himahleh a thuzak uh a manphat dan leh muhnophuai dan a thei ua, huchiin amuh ua, a hondampa hong piang a neihtheih ngeingeina ding un, a belamte leh amun a nusia uhi.
Eite buaina hau, hun nei manlou i himaithei, himahleh Jesu hong piang muh utna nei bangteng nusia ngamte’n Jesu mu in a buainate uh leng bangmah sam omlou in vualzawlna salam leh khalam ah ngah zaw uhi.

III. BELAMPUTEN: ATHUZAK UH OMNA MUN BETHLEHEM ZUAN UH.
A. Bethlehem Jesu pianna: Angel in belampute theihsiam ding in, ahem in a gen mai kei a, a theihtheih ua, Jesu Hondampa ding amau a neih ut uh leh, a muh theih ngeingei na ding un, chiantak in a khua Bethlehem a hihdan a gen hi.

B. Belampute’n a thuzak uh omna khua zuan uh: Belampute’n a thuzak uh omna mun a zotna ding un, thildang bangmah a kibuaisak lou in, tangtak in zuan vengveng uhi. Huchi in Angel in a gen bang leh amau a lunggulh uh leh a lam-et bang ngei un, Jesu Hondampa hong piang tuh a mu uhi. Amau ading a hong piang ahihdan thei in a pom chiat ua, kipaktak in a kiknawn uhi. Jesu hong pianna tuh michih theihsiam ding leh ngahtheih ding a theihsak ahita hi. A poimoh tuh huai nei ding leh hamphatpih ding nang leh ke’n Laisiangthou in a gen bang a gingta leh sepna ahi.

THUKHITNA: “Amah a mite kiang ah a hong a, amah mite’n ana kipahpih kei uh. Himahleh amah kipahpih a pom a, a min gingtate, tengteng Pathian tate suahtheihna a pia.” (Johan 1:11,12) a chih bang in, Belampute’n Toupa Jesu hong pianna amau ading a hondampa ding ahihdan theih ua, a thuzak uh a kipahpih ua, poimoh ngaih in, a hinna uh leh a khosakna ua poithei dingte om mahleh, hilh a omna Jesu pianna mun a zuan ua, a muh un a Hondampa ding in a sang ua, huchiin Pathian’ tate hihna leh Pathian nasep theih na mohpuakna huai ni’n a nei uhi. Pathian Hotdamna a ngah ziak un, amaute’n belampu hihna apan in Pathian nasepna mohpuakna leng nei uhi. Pathian nasep amau a gah muhtheih om tuh:
1. Naungek tanchin Angel in a gen tuh a gen thangta uh.

2. A za peuhmah in Belampute gen lamdangsa uh. 3. Pahtawi leh phatkawm zel in a kiknawnta uh.

Unau it, Toupa hon thupiak Hotdamna thugen leh a nasepna a deih bang zui zel a, midangte’n nang ah Toupa nasepna belampute mahbang a, agah muh ding uh bangbang na neih a om a? Hiai tuh Jesu hotdamna neihna tungtawn kia a om theih ahi hi. Huchi bang gen ding leh muh ding om loupi na hileh? Pathian in a Hotdamna a hon piak Jesu a om neikha nailou houh na hikha ding? Kivel thak ni. Tutung Khristmas hunbi, Jesu Hondam ding a a hongpianna. Michih in hiai hotdamna a nei ding Pathian lungtup thupipen ahi hi. Hiai hun khahsuah lou in, unau it, tun Jesu Hondampa hong piang, nang adi’n pailiamsaklou in nang leng na sang mai diam? Toupa’n simtute tengteng hon vualzawl chiat hen. 

© 2017 Evangelical Baptist Convention. All Rights Reserved. Designed By EBC