Missionary Conf-cum-EBC Missions Golden Jubilee

MiCoGoJ toh kisai theihtuak khenkhat

Thupi: “Gahsuang ding in kuan un” Johan 15:16

Thupatna: MiCoGoJ kichi bang ahia? EBC Saptuam in Mission nasep a pattung kum 1967 apan i simtouh aleh tukum 2017, kum 50 a chinna, Golden Jubilee hita hi. Tuhun tan in Pathian hon makaihna toh Mission Field 5 bang i neitheita hi. Hiaitan a hon pi i biak Pathian kiang a kipahthu genna leh i Missionary-te hanthawnna, thathak gotna, kimeltheih tuahna leh kipahthu genkhawmna hun hiding in, Missionary Conference-cum-EBC Missions Golden Jubilee, 2017 chiin hong kisawm a, alamtom in, MiCoGoJ-2017 kichi hi. Toupa’ ompihna leh phasakpihna lam-en in, November 30 apan December 3, 2017 sung EBC Gospel Centenary Hall, New Lamka a hiai Khawmpi zat ding a thukim ahi. Hiai khawmpi sung in nitak teng mipi Biakkhawmna hun hiding a, EBC Central Choir in lapina leh phatna lapawl kilawmtak sa zel ding ua, Tualsung Saptuam tuam tuam apan BYF lapawl ngaihkhiakna leng omding ban ah, ICI, PCI (R), EOC, ECA leh NTBC Central Choir akipan Pathian phatna ngaihkhiak hiding hi. Sun hunte ahihleh Missionary-te ading biik a workshop leh seminar hun a zat hi ding hi.

 

Kuate hong paikhawm ding: EBC in a etkol Mission Fieldte akipan, EBC in a goih khasum sang Missionary teng, Field Working Committee member teng, Field sung a local saptuam a Chairman/ Secretary teng leh EBC mi pawl dang a semte ahithei liaisiah hong paikhawm ding a geel ahi. Hiaite ban ah, Myanmar a om Evangelical Bible Church (EBC) kichiten leng, kipahthu genna toh hong uap ding uhi. Amaute’n Manipur a EBC te khalam gah ka hi uh chia, Pathian kiang leh EBC Saptuam kiang a kipahthu genna hun hongzang ding uh chihdan ahi. EBC tualsung Saptuamte akipan Pastorte, missions Committee member-te leh Upate hong kihel thei ding a lam-et ahi. Mission Fieldte a kipan leh EBC mi pawldang a semte bel registration form hoihtak kibawl pansan a, dawnna hon bawlte kia telding a, hiai form hon filled-up lou, ahun chiang a phur phut chihte hong lemtang theilou kha ding hi.

 

Kuaten thu gen a sinsak ding: Thugenna hun Rev. S. Vung Minthang, GS, Rev. Paukhanmang Guite, Director of Ministries; Rev. V. Thangkhangin, Director of Missions; Rev. Gin Malsawm, Director, SD; Rev. K. Kamchinkhup, DS Imphal leh Rev. Dr. M. Khamkhanchin, Lecturer, GBC te hi ding uhi. Ki sinsakna toh kisai hiaibang ding a geel ahi: 1. EBC Missions Policy & Guidelines – Rev. V. Thangkhangin, Dir. Missions in sinsak ding a, 2. A Dynamic Missions Strategy for 21st Century Missionaries - Rev. S. Vung Minthang, GS in sinsakna peding hi. Hiaite ban ah, Workshop & Consultation session nuam mahmah, Cross-cultural leh Native Missionary-te ading liauliau in om ding hi. Phatuam mahmah ding a lam-et ahi. Khawmpi a hoh, hiai workshop a tellou teng Transport & Accommodation department makaih in side seeing om ding a, Lamka leh a sehvel a mun poimohte etna nei ding uhi.

 

Zintun dingdan: Mission Field in a huamkhak louh, Saptuamte akipan khawmpi zang ding a hongte zinhawm ahikei ding a, amau lemtan bang in a kizon ding uhi. Mission fieldte zintunna ding hiaibang a geel ahi:

 

Sln

Field min

Palai zah

Zintuntu Saptuam

01

Manipur Mission Field

43

EBCC Central Lamka

02

Nepal Mission Field

34

EBCC Zion

03

Karbi Anglong Mission Field

19

NLBC Elim Veng

04

Dhemaji Mission Field

19

EBCC Dorcas Veng

 

Bangziak a hiai Khawmpi hong kisawm:
Missionary-te ziak a Pathian kiang a kipahthu genna leh thupina piakna hun hiding.
Mun tuamtuam a sem Missionary-te adia kithuahkhawmna hun lemtang hiding.
Missionary-te sinsakna, thopna leh amaute adia thathak lakna hun hiding.
Missionary-te phawkthakna leh amaute hanthawnna hun hiding.
Missionary nasepna thuukseem adia Saptuamte kichialpina hun hiding.
Missionary thupina mun a honna paisantate phawk thakna hun hiding.
Toupa’n kum 50 hon pina tung a kipahthu genna leh thupina piakna hun hiding.

Agah muhdia lam-et te:
Missionary-te’n Khasiangthou thopna tang a, thathak ngah ding uh.
Seppihte leh heutute tungtawn a Missionary-te’n sinkhiak thak nei ding uh.
Workshop & Consultation tungtawn a lamlahna thak muding uh.
Mission field nasepna in khanlohna thak muhna ding.
Saptuam milip in, Missionary-te melmu a, Mission nasepna a thathak ngah ding.
Tuailai tamtak mission nasepna a lunglut leh kipethak Toupan hon pe ding.
Mission nasepna adia thumtu tamsem kibehlap ding.
Missions thilpiak tamsem muh beh hiding.
Pathian min naktak a tawisang a om ding.
Mission nasepna Pathian in vualzawl ahi chih chetna leh thumna uangbawl dia kihanthawnna, Jubilee Prayer Hall hoih leh kilawmtak tunkhiak hi ding.

Jubilee lopna: December 3, 2017 Golden Jubilee lopna hun a zat hiding hi. Hiai hun in, Toupa’n EBC Saptuam Mission nasepna a kum 50 hon pina tung a kipahthu genna, thupina piakna leh Jubilee lopna thupitak a neih kisawm hi. Jubilee suangphuh honna, Souvenir honna, thutak genna leh Jubilee Prayer Hall launching hun poimohtak kizang ding hi. EBC Missions Golden Jubilee in Lamjang a EBC Camp site a Prayer Hall hoihtak hon gahkhiak lam-et ahi. Kim-le-kiang nai a om Saptuamte a kipan Golden Jubilee Greetings manphatak leng omding hi. Hiai hun poimohtak a, Jehovah Pathian kiang a kipahthu genna in, michih in atan theih ding, nek leh dawn kiningchingtak a hawm hiding hi. Kisakkholhna a tamzaw zoh hita hi.

 

Thukhitna: Missionary khawmpi leh Golden Jubilee lohching tak a zatzoh ahihchiang in, i Missionary deihthoh huaitak ten, “Gahsuang ding in” amau omna field chiat zuan kiknawn ding uhi. Toupa’n thumtu leh thilpiak peding mi tamsem hon piakte tungtawn in Khrist Lalgam keklet in omding a, Missionary ten gah tampi hon suang in, khamangthang tampite Jesu Khrist khebul ah pilut in omding uhi. Khawmpi manpha, lohching leh gahsuahtak a zat ahihna ding in, thumna a na kisakhawl a, hongtel ngei ngei ding in i kichial hi. Toupa’n hon vualzawl chiat hen. 


Subcategories

Page 1 of 3

© 2017 Evangelical Baptist Convention. All Rights Reserved. Designed By EBC