Thumna Makai | KTZ

Thumna Makai | July 2021

1. NINGANI: June kha sung teng buaina tampi kal a hong zangzousak a, July kha hon pi tung i biak Pathian kiang a kipahthu gen in, July kha chidam leh lohchingtak a i zat theihna ding in thum ni.

2. SINTAWPNI: EBCC Mawnglian in Biakin hoih leh kilawm mahmah lam zouta uh. Kipahthu gen in Pathian lungtuak biakpiakna ban ah Amah lungtuak hinkhua toh manphatak a zat ahihna ding in thumpih ni.

3. KIGINNI: Saptuam, Covid Task Force leh YPA toh pangkhawm in Community Home Isolation Centre honkhiak ahi. Mi-le-sate awlmohna a neih uh thupi lua ahihman in manphatak a Pathian vualzawlna ziak a sa leh kha damna mun hi ding in thumpih ni.

4. NIPINI: Tuni GBC Day ahihna toh sinsaktu, BOG naupangte leh Staff-te thumsak ni. GBC tungtawn in Toupa gam nasep a kihel tamtak om, maban ah leng Pathian ading a sepaih hangsan kibawlkhiakna munpi hong hih semsem nading in thumpih zel ni.

5. SEPPATNI: EBCC B Kaljang in heutute awlmohna tungtawn in Pastor quarters hoihtak a puah in keklian ta uh. Pathian ompih leh luahpih hi zel ding in thumpih ni. School building lamna paitou lel hi, thumpih ni.

6. SEPNAWNNI: BWA khawmpi lian 22na, BWA Virtual Congress zingchiang July 7 - 11 sung neih ding ahi. EBC apan Rev Gin Malsawm DSD leh Rev Paukhanmang Guite GS kihel ding uhi. Virtual Congress masapen ahi a, lohchingtak a neih ahih theihna din thumpih ni.

7. NILAINI: Dorcas Hall a Head clerk K Jamchinthang leng hun bangtan hiam ngaplou (a veilam khe, khutte tang theilou) a om doctor ki-ensak a CT Scan kilak leh Subacute infarct in right thalamus (mild stroke) a na hi in tu’n inn ah ki-enkol lel in om. Hong damsiangna ding in thumpih lai ni.

8. NINGANI: EBCC Hiangtam Lamka in Mission Veng a Biakin thak a lam uh zousiang phialta uh. Kipahthu gen in zohsiang ahih nading in thumpih ni.

9. SINTAWPNI: Phaizang leh singtang a lou neihnate Pathian vualzawlna toh a hunhun a vuahtui, nisate dong a lohching leh gahsuah hong hihna din thum ni.

10. KIGINNI: EBC semtute’n koimun peuh a omten hun thoveng mu a, a mohpuakna chiat ua naksem a pan hon lak theihna ding un thumpih ni.

11. NIPINI: EBCC T Khuangkhai in Biakin bawl lel ua, kisan mahmah uh. Lungkimna bang a hon lam zohna ding un thumpih ni.

12. SEPPATNI: Upa T Khaipu EBC Hqtr. Dorcas Hall a Driver leng operation in om a, tun inn ah kikem lel a ki-atna ua a hoihloute paihna ding drain pipe leh bag bulhsak ua, a kam a thil nektheihlouhna bang hong om zenzen leh a gil a atui vuak bawngnawi thunna ding a feeding tube a bawl uh, hoihtak a hong damsiangna ding in thumpih ni.

13. SEPNAWNNI: EBCC Suangdoh, Kangkap leh Tuilakzang-ten Biakin lam san lel uh, kipak leh lungtunhuai tak a hon zoh theihna ding un thumpih ni.

14. NILAINI: June a semtu Pension-te: Ms Chingkhongai, Grade IV, Lamka; Mrs Telhauching, Head Clerk, Lamka South; T. Thangkhomang, Head Clerk, Lamka North; Padam Thapa, Missionary Pastor, HMF ahi. AmautePathian in chidamtak a pension mel musak kipahthu gen in maban ah leng a vualzawlna ngetsak in thumpih zel ni.

15. NINGANI: Tulel a Mizoram a biakin kilamlelte: EBCC Aizawl, EBCC Vengnuam Teikhang leh EBCC Teikhang-te ban ah SS building lamlel EBCC Mimbung-te leh Pastor Qtrs ding lam dia kisa EBCC Kawlbem-te thumna ah phawk zel ni.

16. SINTAWPNI: EBCC Vengnuam in leng tukum in Silver Jubilee lop sawm in kisakkholhna pai lel. Pathian in hun thoveng hon bawlsak a manphatak a zat ahihtheihna ding in leh BCD Sunday School building kibawl lel leng lamzangtak a hon zoh theihna ding un thumpih ni.

17. KIGINNI: Singngat Division Office building NH 102B extension in aphutkhak ziak in phelkhiak in om hi. Lamthak pah theihna ding thumna ah delh zui ni. Tun Local pastor Quarters nuai mun awng Tualsung Saptuam Upa Committe Singngat EBCC phalna toh um-tawm zok in huai mun ah office kai tadih uhi. Division office thak neih nawn pah theihna ding in thum ni.

18. NIPINI: Covid-19 lak ah Mizoram Board of Secondary Education nuai a HSLC 2020-2021 Examination results puan ahita a EBC etkol school 3 apan candidates 43 om lak ah 40 lohching. Kipahthu gen ni.

19. SEPPATNI: Khopi a om i Saptuam mite, Pastor leh inkuante, Pathian ompihna leh makaihna toh midangte ading a theihpihtu muanhuai leh sepna leh a kalsuanna ua a lamzan zelna ding un thumpih ni.

20. SEPNAWNNI: EBC Saptuam mite COVID-19 sukkhakte adia damna leh khamuanna ngetsak in, Pathian in hiai natna hiipi ahon hihveng sakna din thum ni.

21. NILAINI: Kha lui in CEC meeting ding himahleh tu dinmun a lemtang lou ahihman in kinei theilou, huchih lai in Saptuam nasepna pen khawltheilou ahihman in ahunhun a vai hon sai Dorcas Hall a heutute General Secretary leh Directors-te thumpih ni.

22. NINGANI: June kha sung in Convention Book House leh Press lamte’n a room-te uh renovate bawl uh, etlawm tuan mahmah mai. Pathian gam nasepna kahiang khat ahihman in asung a semtu Manager leh Staff-te thumpih zel ni.

23. SINTAWPNI: Covid-19 second wave in nasatak a hon nawkkhak ziak in naupang sinlaite ading in nawngkai mahmah, nikum a ginatak a school kai theihlouh kia hilou a tukum leng kai theilou uh. Naupangte amawk manthat louhna ding in Pathian khut ah kemsak in thumpih ni.

24. KIGINNI: Lamka zang leh i zoudawn a i mi leh sa khamtheih sal a tangte Toupa Jesu toh kituahna a neihna ding un leh hiai sal apan a suahtak theihna ding un tuni in thumsak thak ni.

25. NIPINI: Division 7 leh Missions Field 3 i neih a DS, FS, office staff leh Division level leh Field level a committee-te ading in thum ni.

26. SEPPATNI: Tuni saptuam sung a Baptist Children Department a i naupangte tengteng ading leh sinsaktute ading in thumna hun in zang ni.

27. SEPNAWNNI: I Saptuam a semtu khenkhat Covid in hon nawkkhak om zeuhzeuh i hihman in semtu, Pastor, Missionary, Evangelist teacher-te i saptuam office tuamtuam a semtute ading in thum ni.

28. NILAINI: Kum dang bang a chialpi leh camp chihte kinei theilou ahihman in innchih a nu leh pate, i tate adia khalam sinsaktu leh innsung a Tanchinhoih sinsaktu hi ding in kilanthak in inkuan maitam/biakna mahmah pibawl in amaute huai lampi tawn ding a sinsak ding in Nu leh Pa ahitate ading in thum ni.

29. NINGANI: Pathian in hun pha hon piak ngei lamen in tukum a EBC Kumsim Khawmpi, Dorcas Platinum Jubilee, leh Mission-Tuailai khawmpi dingte manphatak a i zat theihna ding in thum ni.

30. SINTAWPNI: Telsuimiten Covid-19, 3rd wave in naupang lamte sukha ding chih a gen uh adik leh diklouh thei naikei mahle hang i ta leh naute hiai natna apan a bitna ding un Toupa khut ah athak in kemsak ni.

31. KIGINNI: Pathian hehpihna toh July kha zangzou thei i hihman in kipahthu gen in, kha thak a Pathian makaihna, ompihna leh vualzawlna toh zangthei ding in thum ni.

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia