Thumna Makai | KTZ

Thumna Makai | June 2021

1. SEPNAWNNI: May kha hong zangzousak a, June kha honpitung i biak Pathian kiang a kipahthu gen in, June kha chidam leh lohchingtak a i zat theihna ding in thum ni.

2. NILAINI: Covid-19 ziak a CES te summer vacation May 1-31 sung kikhak, June 01 apan lutnawnta uh, sintute leh sinsaktute ading in Pathian makaihna leh ompihna ngen in thumpih ni.

3. NINGANI: June 4-5 sung Ms Nemngaihmawi, Dorcas Co-ordinator in EBCC G. Mawnglian, B. Kalzang leh Tuitengzang TBDF te toh fellowship nei ding, thumna ah phawk ni.

4. SINTAWPNI: Covid-19 hipi douna a matawng, Doctorte, Nursete leh Frontline Workerte ading in Pathian humbitna leh makaihna ngen in thumpih ni.

5. KIGINNI: Intern Missionary, Mr Ginkhanzam leh Mr Zamkhanlian ten OTI ah training neilel uh, family a va om ahihban uah, covid-19 ana positive kha ua, thumnate ziak in hoihlam hita ua theih ahi, hong damsiang nading un thumpih ni. Lemlouhna dang omkei a leh zingchiang June 6 in WEC malakna in EBC apan missionary lunglutte ading bik in mini Auditorium ah CO kisinsakna kipan ding.

6. NIPINI: Singngat Division office a semtu Rev N Thawndoulian DS leh office staff-te leh a inkuan chiatte uh Pathian ompihna leh makaihna ngen in thumsak ni.

7. SEPPATNI: Covid-19 ziak in saptuam office tuamtuamte deihbang in kai theihlouh in om mahleh, nasepding om bangbang ahunhun a sep ahihtheihna ding in thum ni.

8. SEPNAWNNI: June 9 in CEC meeting poimohtak omding, Pathian deihna bang a saptuam maban ding hon gel ua, meeting lamzangtak a zoh ahihna ding in thumpih ni.

9. NILAINI: Covid care centre a om damloute leh amaute kemtute ading in Pathian ompihna leh makaihna ngen in thumpih ni.

10. NINGANI: Covid hipi ziak in mipi biakkhawmna om thei kei mahleh, Upaten saptuam mipite hoihtak a hon kepzom zel theihna ding un thumpih ni.

11. SINTAWPNI: June 12 in Lamka South Division, DBDF makaihna in meithai fellowship EBCC Vengnuam ah omding, lohching leh manpha ahihna ding in thumpih ni.

12. KIGINNI: Thanlon Division office a semtu Rev M Zalian DS leh office staff-te leh a inkuan chiatte uh Pathian ompihna leh makaihna ngen in thumsak ni.

13. NIPINI: Covid hipi hat mahmah kal ah Missionary-ten ahihtheih bang bang un semthei zel uh, kipahthu genkawm in, Tanchinhoih nasepna in ma asawnzel theihna ding in thum ni.

14. SEPPATNI: Vangai Division office a semtu Rev Kamzamuan DS leh office staff-te leh a inkuan chiatte uh Pathian ompihna leh makaihna ngen in thumsak ni.

15. SEPNAWNNI: Covid-19 hipi bangchi zongteng hat mahleh, mission nasepna khawl theilou i hih man in, India gamsung a pawl tuamtuam a semtute ban ah, khovel gam tuamtuam a Toupa nasemte ading in thum ni.

16. NILAINI: Saptuam makaiten pandemic hun a Toupa’ deihdan a mipite honpi theihna ding un thumpih ni. Tukum in GBC apan in M.Div., B.Th, & Dip. apan in sinlai naupang 56 te graduate uhi, amaute ziak a kipahthu gen in maban a kalsuanna ding ua thumpih ni.

17. NINGANI: Dorcas pawl makaihna a Pathian nasepna kahiang poimoh mahmah, Puankhuina (DOTPROJ), lamzangtak a paitheizel ahihna ah kipahthu gen in, maban a leng mi tampite adia nektak muhna dia, kisinkhiakna honghihna ding in thumpih ni.

18. SINTAWPNI: Convention Book House a semtute ziak a kipahthu gen in, maban a leng sep ding omte fel leh kizentak a honsepzel theihna ding un thumpih ni.

19. KIGINNI: June 20, Pate Ni in Rev Paukhanmang Guite, GS in EBCC Shillong ah thu gen ding, Rev S Vung Minthang, Director of Ministries in EBCC Aizawl ah thu gen ding a, Rev Gin Malsawm, Director, SD in EBCC Sinzawl ah thu gen ding. Pathian Khasiangthou ompihna leh thopna ngen in thumpih ni.

20. NIPINI: Covid hipi ziak in Camp, Crusade leh chialpite omtheikei mahleh, sawltakte leh heutute counselling neihpih ding mi om gigesim ahihman in, khalam leh salam a kingaisia leh beidongte lampi dik a kawkmuh theih zelna ding un thumpih ni.

21. SEPPATNI: Imphal Division office a semtu Rev V Nenglian DS leh office staff-te leh a inkuan chiatte uh Pathian ompihna leh makaihna ngen in thumsak ni.

22. SEPNAWNNI: June 23-26 sung Lamka North Division saina in Mantripukhri, Imphal ah Division sung a om Pastorten Renewal Camp nei ding ua, Rev S Vung Minthang, Director of Ministries thugenpi in pang ding. Thumna ah phawk ni.

23. NILAINI: Lamka South Division office a semtu Rev L Khaikhansong DS leh office staff-te leh a inkuan chiatte uh Pathian ompihna leh makaihna ngen in thumsak ni.

24. NINGANI: June 25-27 sung EBCC Mualpheng in Second Coming chialpi nei ding a, Rev Gin Malsawm, Director, SD in thu gen ding, thumpih ni.

25. SINTAWPNI: Lamka North Division office a semtu Rev V Thangkhangin DS leh office staff-te leh a inkuan chiatte uh Pathian ompihna leh makaihna ngen in thumsak ni.

26. KIGINNI: Covid hiipi akipan a pathian un humbit theilou chi in, Hindu pathian tampi mahmah luipite ah paihlut in om chih i theihdan ahi. Hiaibang miten Pathian hing honmuhna ding un lungsimtak toh Pathian buan in thum ni.

27. NIPINI: Covid pandemic in a sukkhak niteng nektawm zongte ading in Pathian ompihna leh makaihna ngen in thum ni.

28. SEPPATNI: Mizoram Division office a semtu Rev V Ginsianthang DS leh office staff-te leh a inkuan chiatte uh Pathian ompihna leh makaihna ngen in thumsak ni.

29. SEPNAWNNI: I saptuam sung a Pastorte ziak a kipahthu gen in, amauten hiaibang hipi lak a Toupa’ saptuamte honkep zom zelna ding uah tunglam pilna ngen in thumpih ni.

30. NILAINI: Buaina haksatna tampi lak ah Pathian hehpihna toh June kha bang zangzou thei i hihman in kipah thu gen in, kha thak a Pathian makaihna, ompihna leh vualzawlna toh zangthei ding in thum ni.

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia