Thumna Makai | KTZ

Thumna Makai | April 2021

1. NINGANI: Damtak a March kha hon zangzousak i biak Pathian kiang a kipahthu gen in, April kha leng manphasem leh gahsuahsem a i zat theihna ding in Khasiangthou makaihna ngen in thum ni.

2. SINTAWPNI: Tuni Good Friday apan Easter Sunday tan Rev S Gin Malsawm in EBCC Pearsonmun ah, Rev V Thangkhanmuan in EBCC Mission Compound Churachandpur ah, Evan. Damkhothang in EBCC Shillong ah, Evan. Lianding in Nghathal ah hun zang ding uh, Rev Paukhanmang Guite GS in Central Lamka ah, Good Friday hun zangding, amaute Pathian Khasiangthou ompihna ngetsak in thumpihni.

3. KIGINNI: March 5, 2021 in Vaikhawtlang a Ebenezer Academy in kum 25 chinna “Silver Jubilee” hun zang ua, Jubilee Suangphuh honna leh latna Rev. Dr. V. Ginsianthang DS in va nei hi. Hiai School ah tulel in Nursery apan Class VIII tan sinlai naupang 118 leh sinsaktu 10 om hi. Kipahthu gen in maban hong lamzan zelna ding un thumpih ni.

4. NIPINI: COVID-19 ziak a haksatna tampi kal ah, Saptuam in budget i bawl bangbang kheng in, ban ah supplementary budget bang bawl thei i hihman in kipahthu gen ni. Missions department lam bang nasatak in hong khang a Pathian vualzawlna ahi chih phawk in kipahthu gen ni, maban ah tua bang a petute Pathian vualzawlna ngetsak in thumpih lai ni.

5. SEPPATNI: Tukum a Bible sinna zou Pastorte leh zou dingte, Pastor L Thawngkhangin, Pastor M Ginzatun, Pastor Khamkhanchin Ngaihte ziak in kipahthu gen in maban a Pathian makaihna ngen in thumpih ni.

6. SEPNAWNNI: Mizoram Division sung a Biakin/Sunday School building kibawl lelte: Tlangnuam (Aizawl), Dinthar (Aizawl), Vengnuam (Teikhang), Teikhang EBCC & Mimbung SS building te ading in thum ni.

7. NILAINI: Saptuam kemtu Upa Ordain Division leh Khopi ah 695 leh Missions field ah 27 i neih lellel ahi ua, amaute Saptuam kepna ah veina leh awlmohna toh Pathian makaih leh ompihna ngetsak in thumpih ni.

8. NINGANI: Bible translation leh checking pai lellel, hiai a panla heutute thumna ah phawk ni. Kum nawn a Piching Nipini Skul Sinlai hilhchianbu leng Rev S Gin Malsawm in gelh lellel ahihman in lamzangtak a hon zohna ding in thumpih ni.

9. SINTAWPNI: Tuni apan date 11 sung EBCC Behiang (T) in Chialpi nei ding a, Evan. T Damkhothang thugenpi in pang ding. Khasiangthou vehna, ompihna leh makaihna ngen in thumpih ni.

10. KIGINNI: EBC Missionary 2021 a lakna ah mi ngate– Ginkhanzam, Nangsonlian, Jamkhanlian, Kaisuanlal leh Lianbiakmawi thumpih ni. Amaute ban ah Mission nasem ding a kisa hiai hun a candidate a hong telte leng amau omna chiat a kizat theihna ding un thumpih ni.

11. NIPINI: Division chih leh Local chih a BDF te’n gentheite kithuahpihna a banzak thei lai a om Pathian kiang ah kipahthu gen ni, huchih lailai in Khalam kikepna a leng amaute Khrist kiang a tut ding i mohpuakna ahi chih phawk in panla a kalsuan zel thei ding in thumpih ni.

12. SEPPATNI: Evan. Thangkhansiam in Tangsa Baptist Church Association toh sepkhawmna ah Music lam nasepna nei a om tu kha in hong paikheta, kipahthu gen in mun thak ah sem ding ahihna ah lamzangtak leh lohchingtak a paitouh theihna ding in thumpih ni

13. SEPNAWNNI: Youth Center PK Street a i neih counsellor-te’n mimal, nupa leh poimoh bangbang a mi houlimpihna ding in manphatak leh phatuamtak in kizang tou thei zel ahihman in kipahthu gen ni.

14. NILAINI: Tuni akipan date 18 tan EBCC Guwahati in BCD Chialpina nei ding ua thugentu in Evan. G Lianding kizang ding, thumpih ni.

15. NINGAINI: Hqtr. a Mission Department in Guwahati ah Mission Center ding mun neih a huai a pan mission nasepna pat ding lunggulhna liantak kinei hi. Tua ding in a process pai lellel ahihman in hiai na poimohtak sepkhiak theih ahihna ding in thumna ah phawk ni.

16. SINTAWPNI: Missionary thak ding lakna a paisuak mi 5te ziak a kipahthu gen in, amaute mission fieldte ah field exposure in omlel uh, thumna ah phawk ni. Tuni apan date 18 tan EBCC Kaihlam in chialpina nei ding uh, thugen dingte Evan. T Damkhothang leh Rev Chinkhengoupau te thumpih ni.

17. KIGINNI: Central a Department tuamtuamte tu term thak 2021-2023 sung committee-te’n amau department chiat gahsuah leh lamzangtak ban ah mohpuakna piak a om bangbang hon sep buchin theihna ding un Pathian ompihna leh makaihna ngen in thumpih ni.

18. NIPINI: Saptuamte hon vaaktu khat a i neih Phatna lapawl Kikhopnate a sa thei zelzel Local BYF lapawl, Division Lapawl tengteng ban ah, Central Choir lapawlte leh choir conductor-te Pathian in manpha zawsem leh lohching zawsem a hon zat sakna ding in thumpih ni.

19. SEPPATNI: Khalui March 22-25, 2021 sung Hausate camp sai ahi, hiai hun a hausa hunkhop tak tel ua, khalam ah phattuampih mahmah uhi, tua khalam a Khrist nungzuihna a hong khan semna ding un thumpih zom zel ni.

20. SEPNAWNI: LRCC leh a kahiang tuamtuamte, asung a semtute, Managing Committee Board leh kep leh etkol a om inmate-te leh hiai tungtawn a tuni tan a i sukkhak zelte ziak in kipahthu gen in amaute Pathian makaihna leh ompihna ngetsak in thumpih ni.

21. NILAINI: Tuni akipan date 25 tan NTBC V Munhoih in Camp sai ding ua Evan. T Damkhothang in thu gen ding. Camper-te, vaisaite leh thugentu thumpih ni.

22. NINGANI: Zingchiang CEC tukhawm ding vaihawmna lamzang leh manphatak a a pai theihna ding in member leh Chair lamte Pathian vualzawlna ngen in thumpih ni.

23. SINTAWPNI: MT-2020 a team poimoh mahmah Team Timothy-te malakna in tuailai khamtheih sal a tangte ading bik in mun tuamtuam leh hun tuamtuam ah Camp sai ahi. Hiai camp-te tungtawn in tuailai tamtak hinkhua kikhek muhtheih ding in om. Pathian kiang kipahthu gen in Team Timothy a kihelkhate thumpih ni.

24. KIGINNI: Tuni apan zingchiang tan EBCC Zoan in Chialpina hun zang ding uh. Thugentu ding Evan. G Lianding. Vaisai, kihel ding mipi leh thugentute thumpih ni.

25. NIPINI: Financial Year thak a i din toh kiton in Headquarter ah, Division chih ah, Field te ah, leh local chih a te Plan & Budget thakte sepsuahna ding a nasepnate thumpih in Pathian makaihna ngen thak ni.

26. SEPPATNI: Maban ah MDC election neihna ding toh kisai in, mi malmal in mahni deihtelna vote siangthoutak a khiak ahih theihna ding leh buaina omlou a thovengtak a sai ahih theihna in ding in thum ni.

27. SEPNAWNNI: Vangai Division, Lamka North Division, Lamka South Division, Singngat Division, Thanlon Division leh Mizoram Division sung a i semtu Evan. Skulpute, naupangte awlmohna leh veina toh thanuam leh kipezoutak a hon sep zel theihna ding un amaute thumpih ni.

28. NILAINI: I Zoudawn lam a i lou bawlte kihal thei chiat, maban lou nasepna a tunglam leh leilam a haichite khanna leh gahsuahna ding a poimoh bangbang ahunhun a Pathian vualzawlna i don theihna ding in Pathian kiang ngen in thum ni.

29. NINGANI: Khalui a Vangai Division a Evan. N Thangsuanpau leh a team-te’n vehna a neih uh tungtawn in Pathian nasep tunitan in muhtheih ding bangzah hiam omte ziak in kipahthu gen ni.

30. SINTAWPNI: April 30, 2021 apan May 2, 2021 sung Division Naupang Khawmpi 38na, EBCC Teikhang ah om ding a, Division sung a pastor li om teng in thugenna hun zang ding uh, thumna in phawk ni. Khathak a vualzawlna tamsem i don theihna ding in thum ni.

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia