BYF, BDF, BCD Corner | KTZ

KHRISTIAN VUALZOU HINKHUA KICHI BANG AHIA?

Khristian Vualzou hinkhua kichi hunteng, niteng a i hinkhua Toupa mai a kipumpiakna leh kilatkhiakna hinkhua ahi.

Khristian vualzou hinkhua kichi GINNA a kibulphuh leh zungkai a kinga ahi. Huai ginna kichi Hebrew 11 ah ginna a mihangsante’n lam chi tuamtuam a vualzohna a na ngahdan uh muhtheih ding in om hi. I Pathian uh bangteng tung a avualzou gige, Kros tung a vuallelh ziak a sihna tuak hizaw lou in Setan tung a vualzohna kipatna hizaw ahi, huai ah khelhna tengteng kilhbelh leh ngaihdam i ngahna ahi. Khovel a thuneihna leh lalna tengteng hawlkhiakna ding a kalbi masa Jesu mahmah in a nasep a patma a puankhiak thumal zohna ahi. Huan Mark 14:62 ah Jesu’n vualzou ahihdan a chetna ding “Huan, Jesu’n, Hi e; Mihing Tapa Thilhihtheihna taklam a tu a, van mei lak a hong pai na mu ding uh, a chi a.” Hiai lametna leh ginna nei a ni khat ni chiang a eite leng a bukim a vualzou hinkhua zang dingte i hi.

Khristian Vualzou hinkhua in i hinkhua a niteng a i tuah leh khovel a om tengteng tung a vualzohna, huaite tuh Khovel a thil om tengteng, sa utnate, mit utnate, damsung thupina limte khawng Pa akipan ahikei a, khovel akipan ahi zaw ngal a, 1John 2:16. Lauhna tung a vualzohna, Pathian khamuanna theihchetna (John 14:27; 16:33). Vualzou hinkhua kichi haksatna leh buaina, gimthuakna leh adangdangte apan vualzohna ahi. Romte 8:35 Khrist itna akipan kuan ahia honkhen ding? Gimthuakna in hia, lungngaihna in hia, sawina in hia, taam in hia, vuaktanna in hia, lauhhuaina in hia, temsau in hia hon khen ding?

Hiai teng kia hilou in Khristian vualzou hinkhua in sihna tung a leng vualzohna hon tun in (1 Corinthians 15:54–55) van ah a kipahman in hon zui ding hilai ahi (Revelation 21:7). “Mi diktat ginna in a hing ding” (Romans 1:17), vualzou hinkhua neihna ding a ginna i gen pen kigen uang lua chih om ngeilou himhim ahi. “Pathian suahsak peuh in khovel a zou zel ngal a; hiai ahi khovel tung a vualzohna, i ginna. Jesu tuh Pathian Tapa ahi chih ging mi kia ngallou, kuan khovel a zou zel a?”(1Johan 5:4-5). Vualzou hinkhua i neihna ding a khemna leng i tuah ding tampi om ahi. 1 Korinthte 10:13 “Mihing thuaktheih val khemna himhim na tung uah a tung ngeikei hi. Pathian zaw a muanhuai ahi, aman na thuak theih val uh khemna na tuah uh a phalkei ding; na thuak theihna ding un khemna peuh ah taikhiakna lampi a bawl pah zaw ding hi.” Hiai muntak a Paul in Korinth Saptuam milim biakna leh khemna in a tuamte kiang a a gen ahi. Khotang ah, sum-le-pai ah, politics vai ah hinkhua lui a kiknawn a ginglou mite biakna va zuih ding in khemna tam mahmah hi. Himahleh Pathian muanhuai mahmah ahimanin a tate tua bang khemna a i puklouhna ding a khemna i tuah hunhun a leng a suahtakna ding leh tua bang khemnate tung a vualzohna i ngahna ding a lampi hon gelsak gige ahi. Gingtu khat in khemna a tuah chiang in Pathian mahmah in huai khemna ziak a khiallou ding a suahtakna ding lampi hon bawlsak pen mi malmal in a zuih leh zuihlouh eimah sia-le-pha theihna a kinga ahi. Tua bang a huai bang khemna tung a vualzohna ding a poimoh mahmah tuh niteng leh hunteng a Pathian mai a kipumpiak leh kilatkhiak gige poimoh mahmah ahi. Johan 15 ah vualzou hinkhua neihna ding in Jesu mahmah in tehkhinna thu a na gen om hi. Jesu Khrist pen a GREP GUI ahihdan leh eite i hinna leh a gah nading a ahiangte i hi ua, kizop leh kichimat gige poimoh mahmah hi. Hiai a thumal kigen OM kichi pen Greek thubul ah ‘Na omna a om in’ chihna ahi, Khristiante koi a om, Khristian kichite tuh Jesu Khrist ah i om na uhiam kivelchian chiat ni (Ephesians 2:13).

Khristian Vualzou hinkhua kichi tangtawn a suahtakna kia hilou in ginna a khualzinna ban ah niteng a thupukna bawl a i hinkhua a Khrist hihna taklat. (Galatiate 2:20). Ginna tuh thil lamette om ngei a theihna, thil muhlouhte theihchetna ahi. (Hebrute 11:1). Ginna a hinkhua kichi in bangkim tung a Pathian thunei ahi chih muanngamna ahi. Kolosate 3:1 “Huchi in, Khrist toh kaihthoh khawm a na omtak ngal uleh, tunglam a Pathian taklama tu Khrist omna a thil omte tuh zong un, Tunglam a thil omte ah na lungsim uh nga un, lei a thil omte a nga lou in. Na sita ua, tuin na hinna uh Pathian ah Khrist toh sel in a om hi. Khrist i hinna uh a hong kilak chiang in nou leng amah kiang ah thupi in na kilak sam ding uhi.”

Vualzou hinkhua in khovel lam en a haklou in vanlam en a Jesu Khrist i zuih ding leh etton ding, Aman zahlaknate ngaineu a kros a thuak a, mikhialte apan a huchibang a selkalhna thuakpa’n vualzohna ngah in Pathian mangtutphah taklam a va tu hi. I Tangtawn hinna Jesu Khrist a hihkip leh bukim in om hi. Nang leh kei leng i ginna a Jesu Khrist taklam a kep leh don a om i hi, huai mah vualzou hinkhua a hinna ahi.

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia